በኢትዮጵያ አስተናጋጅነት የሚካሄደው 76ኛው የዓለም ጤና ድርጅት የአፍሪካ ቀጠና ጉባዔ አዲስ አበባ በሚገኘው የአድዋ ድል መታሰቢያ የመክፈቻ መርሃግብር በተለያዩ ዝግጅቶች በድምቀት መካሄድ ጀምሯል።
በመድረኩ ከ40 በላይ የአፍሪካ ሃገራት የጤና ሚኒስትሮች፣ ተወካዮች የዓለም ጤና ድርጅት እና ሌሎች አለም አቀፍ ተቋማት፣ ተመራማሪዎች እና ባለድርሻ አካላት በመሳተፍ ላይ ይገኛሉ።
የኢፌዴሪ ምክትል ጠቅላይ ሚኒስትር ክቡር አቶ ተመስገን ጥሩነህ በጉባኤው የመክፈቻ መልዕክታቸው ከ130 ዓመታት በፊት ቀደምት ኢትዮጵያውያን በዓድዋ በአይበገሬነት ያስመዘገቡት ድል፣ ዛሬ የሕዝባችንን ጤና በራስ አቅም የመጠበቅ ሁለንተናዊ ሉዓላዊነትን በማረጋገጥ መደገም አለበት ብለዋል።
የጤና ሉዓላዊነት ማለት መድኃኒቶችንና የሕክምና ቁሳቁሶችን በራሳችን የማምረት፣ የጤና ባለሙያዎቻችንን የማሰልጠንና የማቆየት፣ እንዲሁም ወረርሽኞችን ወይም የጤና ቀውሶችን የዓለምን እጅ ሳንጠብቅ በራሳችን የመቋቋም ብቃት መፍጠር መሆኑን አቶ ተመስገን ተናግረዋል።
በተጨማሪም በጤናው ዘርፍ የግል ባለሀብቶች ከመንግሥትና ከሌሎች ባለድርሻ አካላት ጋር ተቀራርበው የሚሠሩበት አህጉራዊ መድረክ እንዲኖር፣ የአፍሪካ ጤና ፌዴሬሽን ዋና መሥሪያ ቤት በአዲስ አበባ እንዲመሠረት የኢትዮጵያ መንግሥት ሙሉ ድጋፍ እንደሚያደርግ ገልጸዋል።
በጉባዔው እየተደረጉ ያሉ ቅድመ ዘግጅቶችን፣ የጊዜ ሰሌዳ እና ጉባዔው ተያያዥ ጉዳዮችን በተመለከተ ለልኡካን ቡድኑ ማብራሪያ የሰጡት ዶ/ር መቅደስ፤ የዓለም ጤና ድርጅት ቀጠናዊ ጉባዔውን በኢትዮጵያ በማድረጉ የተሰማቸውን ደስታ ገልጸዋል፡፡
ለጉባኤው የተደረጉ ዝግጅቶችን ተዘዋውረው መመልከታቸውን የገለጹት ፕ/ር መሃመድ፤ ጃናቢ በበኩላቸዉ የደህንነት፣ የአዳራሽ ዝግጅት እና የትራንስፖርት አቅርቦት በመልካም ሁኔታ መዘጋጀቱን መመልከታቸውን ተናግረዋል፡፡ ስብሰባው በተሳካ ሁኔታ አንደሚካሄድ ያላቸውን እምነትም ገልጸዋል፡፡
በተጨማሪም በአፍሪካ የህብረተሰብ ጤና ስጋቶች እና የድንበር ተሻጋሪ በሽታዎች ቁጥጥር በተመለከተ ውይይት ያደረጉ ሲሆን፤ በጉባዔው የሚነሱ የአፍሪካ የጤና ጉዳዮች ላይ መክረዋል፡፡
በ76ኛው የዓለም ጤና ድርጅት የአፍሪካ ቀጠናዊ ጉባዔ ከተለያዩ የአፍሪካ ሃገራት እና ከአለም አቀፍ ድርጅቶች የተወከሉ ተሳታፊዎች እንደሚታደሙ ይጠበቃል፡፡
