በአገራችን፣ የኮሮና ቫይረስ ያለበት የመጀመሪያው ሰው ተገኝቷል

Submitted by dawit.berhanu on Fri, 03/13/2020 - 15:10

የኢትዮጵያ ሕብረተሰብ ጤና ኢንስቲትዩት፣ በቫይረሱ የተያዘ ግለሰብ ኢትዮጵያ ውስጥ መገኘቱን አረጋገጠ፡፡ ግለሰቡ፣ የ48 አመት የጃፓን ዜጋ ሲሆን፣ የካቲት 25/ 2012 ዓ/ም ከ ቡርኪና ፋሶ ወደ አዲስ አበባ መምጣቱ ታውቋል፡፡ ኢትዮጵያ፣ በሽታው ከተከሰተ ጊዜ  ጀምሮ በተዘረጋው የተጠናከረ የበሽታዎች ቅኝት ስራ፣ የመጀመሪያውን ታማሚ ለመለየት ችላለች፡፡ ከበሽተኛው ጋር የቅርብ ንክኪ የነበራቸው ግለሰቦችም የመለየትና ክትትል የማድረግ ስራ ተጀምሯል፡፡ ታማሚው፣ አስቀድሞ በተዘጋጀው  የለይቶ ማከሚያ፣ ተገቢው የሕክምና ክትትል እየተደረገለት ሲሆን፣ እስካሁን ባለው ሁኔታ የከፋ የጤና እክል አልገጠመውም፡፡ 

ዶ/ር ሊያ ታደሰ የጤና ሚኒስቴር ሚኒስትር ሆነው ተሾሙ

Submitted by dawit.berhanu on Thu, 03/12/2020 - 15:30

የኢፌዴሪ የህዝብ ተወካዮች ምክር ቤት በዛሬው እለት 5ኛ ዓመት የስራ ዘመን 14ኛ መደበኛ ስብሰባ በጠቅላይ ሚኒስትር ዶክተር ዐቢይ አህመድ የቀረበለትን የተለያዩ የሚኒስትሮች ሹመት ተቀብሎ አጽድቋል። ዶ/ር ሊያ ታደሰ የጤና ሚኒስቴር ሚኒስትር ሆነው ተሹመዋል፡፡ የሚኒስቴር መስሪያ ቤቱ አመራሮች እና ሰራተኞች መልካም የስራ ዘመን እንዲሆንላቸው እንመኛለን፡፡

የእናቶችን ሞት መቀነስ ቤተሰብንና ሀገርን መታደግ ነው

Submitted by dawit.berhanu on Tue, 01/14/2020 - 14:11

የኢፌድሪ ፕሬዝደንት ክብርት ሳህለወርቅ ዘውዴ በመድረኩ ላይ እንደገለፁት የእናት ሞት አንድ ጊዜ ብቻ አይደለም እያደረ የሚቆረቁር ነው፡፡ ለቤተሰብ መፍረስና ለሀገር ዕድገት ማነቆ ከመሆኑ አንፃር የእናቶች ህክምና በተገቢው ሰአትና ቦታ በሰለጠነ የጤና ባለሙያ ቢሰጥ አብዛኛውን ሞት መከላከል ይቻላል ብለዋል፡፡

የጤና ሚኒስትር ዴኤታ ዶ/ር ሊያ ታደሰ በበኩላቸው በቤት ውስጥ ሳይሆን በጤና ተቋም መውለድ እንዲችሉ የመተግበሪያ አቅጣጫዎች ላይ ኃላፊነት በተሞላበትና በቁርጠኝነት መስራት እንደምያስፈልግ ተናግረዋል፡፡

በእርግዝና ወቅት በወሊድና ድህረ ወሊድ ጊዜ የደም መፍሰስ፣ ከፍተኛ የደም ግፊት፤ በመላ ሰውነት የተሰራጨ ኢንፌክሽን እና ንፅህናውን ያልጠበቀ ጽንስ ማቋረጥ አሁንም የእናት ሞት ምክንያቶች ሆነው ቀጥለዋል፡፡

በመድረኩም ላይ የፈዴራልና የክልል አመራሮች እንዲሁም የተለያዩ ባለድርሻ አካላት በጉዳዩ ላይ ለመስራት ተፈራርመዋል፡፡